^{Uzbekistan! 2026} Jizzaxda hokim yordamchisiga bosim o‘tkazib 164.6 mln so‘m kredit oldirgan shaxs ushlandi, Toshkentda 33.4 ming dona kuchli ta’sir qiluvchi dori vositalari sotilishining oldi olindi, O‘zbekistonda 10 yildan beri faoliyat yuritgan uyushgan narkojinoiy guruhlar aniqlandi, Xorazmda mast holda avtomobil haydab piyoda oʻlimiga sabab boʻlgan IIB xodimi 3 yil 1 oyga qamaldi, С начала 2026 года в Узбекистане ликвидировали 8 нарколабораторий и 22 ОПГ, Dahshatli qotillik qurboni bo‘lgan Sayyora uchun g‘oyibona janoza o‘qildi, 55 ta qoidabuzarlik. Ellik oltinchisi o‘lim bilan tugadi, Toshkentda yana bir narkolaboratoriya aniqlanib minglab psixotrop dorilar musodara qilindi, Akmal Shukurovni ozod qilgan 4 nafar sudya qamoqqa olindi, Bir qotillik izidan ochilgan ikkinchi vahshiylik

2026.3.2 С начала 2026 года в Узбекистане ликвидировали 8 нарколабораторий и 22 ОПГ
За два месяца стражам порядка удалось изъять из оборота 41 кг традиционных наркотиков, более 100 кг синтетических и около 200 тыс единиц психотропных лекарств.
С начала 2026 года в Узбекистане ликвидировали 8 нарколабораторий и 22 ОПГ
С начала 2026 года в Узбекистане правоохранители в ходе рейдов ликвидировали 22 организованные наркопреступные группы, задержали 5 лидеров преступных групп и их 84 пособника, сообщает пресс-служба МВД.
Согласно информации, за два месяца стражам порядка удалось ликвидировать 8 нарколабораторий, 3 из которых специализировались на изготовлении психотропных веществ, а 5 — синтетических наркотиков. Кроме того, за этот период правоохранителям удалось ликвидировать 22 организованные наркопреступные группы, задержать 5 лидеров преступных групп и их 84 пособника.
Отмечается, что среди задержанных граждан 20 человек занимались распространением психотропных препаратов, 28 – традиционных наркотиков, 41 – синтетических наркотиков через интернет-магазины. Также с начала года из незаконного оборота удалось изъять 41 кг традиционных наркотических средств, более 100 кг синтетических наркотиков, около 200 тыс. ед. психотропных лекарственных препаратов (что эквивалентно 1 млн доз), а также почти 2 тонны прекурсоров.
Отмечается, что преступные группы осуществляли деятельность от 3 месяцев до 10 лет и ежегодно реализовывали до 1 млн ед. психотропных веществ, от 2 до 2,5 тонны гашиша и опия, а также сотни килограммов синтетических наркотиков через интернет.
Ранее сообщалось, что в Ташкенте и Ташобласти правоохранители раскрыли цепочку оборота наркотиков от производства до сбыта. Стражи порядка задержали закладчиков и с их помощью нашли нарколабораторию.

2026.3.2 Toshkentda 33,4 ming dona kuchli ta’sir qiluvchi dori vositalari sotilishining oldi olindi
Toshkentda kuchli ta’sir qiluvchi dorilar sotgan 4 kishi ushlanib, ularga nisbatan jinoyat ishi qo‘zg‘atildi. Bu haqda Davlat xavfsizlik xizmati xabar berdi.
Ichki ishlar organlari xodimlari hamkorligida o‘tkazilgan tezkor tadbirda, Toshkent viloyatining Zangiota tumanida yashovchi, 1996-yilda tug‘ilgan shaxs va uning 1999-yilda tug‘ilgan samarqandlik tanishi poytaxt hududida to‘xtatilib tekshirilganda ularning yonida 8400 dona “Regapen” kuchli ta’sir qiluvchi dori vositalari borligi aniqlangan.
Shuningdek, ular vaqtinchalik ombor sifatida foydalanib kelayotgan Chilonzor tumanidagi xonadondan ham 12 600 dona “Regapen” va 10 ming dona turli xildagi, ishlab chiqarish firmasi aniq bo‘lmagan, qo‘lbola usulda tayyorlangan dori vositalari, dorilarni qadoqlashda foydalaniladigan 500 dona idishlar va qalbaki dorilarning qadoqlariga tegishli qaydlarni yozishga mo‘ljallangan markerlovchi miniprinter qurilmasi ashyoviy dalil sifatida olingan.
DXX Toshkent shahar bo‘yicha boshqarmasi hamda Ichki ishlar va bojxona organlari xodimlari hamkorligida o‘tkazilgan tezkor tadbirda esa, 1994-yilda tug‘ilgan shaxs 6 dona “Zardeks” kuchli ta’sir qiluvchi dori vositasini 600 ming so‘mga sotgan vaqtida qo‘lga olingan.
Shuningdek, tezkor tadbir davom ettirilib, unga bu turdagi dori vositalarini yetkazib berib turgan, Namangan shahrida yashovchi, 1987-yilda tug‘ilgan, muqaddam sudlangan fuqaro ham poytaxt hududida ushlangan. Uning avtomobilidan 12 400 dona “Zardeks” va 14 dona “Regapen” dori vositalari protsessual tartibda rasmiylashtirib olingan.
Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.
Avvalroq Toshkentda fuqaro uyidan 1,6 milliard so‘mlik kuchli ta’sir qiluvchi va sertifikatsiz dorilar topilgandi. Farg‘onada o‘zbek-qirg‘iz davlat chegarasini buzib, 1,3 milliard so‘mlik kuchli ta’sir qiluvchi dorilarni olib o‘tgan shaxs qamoqqa olingandi.

2026.3.2 Xorazmda mast holda avtomobil haydab, piyoda oʻlimiga sabab boʻlgan IIB xodimi 3 yil 1 oyga qamaldi

Xorazm viloyatida ichki ishlar organi xodimi mast holda avtomobil boshqarib, 29 yoshli piyoda ayolni urib yuborgani uchun sudlandi. Yoʻl-transport hodisasi 2025-yil 27-sentyabr kuni Urganch—Shovot yoʻlida sodir boʻlgan. Sud hukmi joriy yil 23-fevral kuni eʼlon qilingan. “Daryo” sud hujjati bilan tanishib, voqea tafsilotlarini oʻrgandi.

Ayblanuvchi nima degan?

Hujjatda haydovchi sudda voqeani qanday aytib bergani bayon qilingan. YTH tungi soat 22:00 atrofida yuz bergan. Avariyadan oldin viloyat IIBda katta inspektor boʻlib ishlagan Umarbek Atamuratov kursdoshi bilan choyxonada spirtli ichimlik ichganini aytgan. Keyin Tracker-2 avtomobilida Shovotdan Urganchga yoʻlga chiqqan. Haydovchi kechasi avtomobil old chiroqlarini yoqmasdan harakatlangan.

Yoʻlda ketar ekan, mashinaning oʻng tomonida qattiq zarba ovozini eshitgan va toʻxtagan. Avtomobildan tushgach, bir ayol ariq ichida yotganini koʻrgan va odam urib yuborganini tushungan.

Sudda bergan koʻrsatmasiga koʻra, oʻsha paytda ortidan Gentra avtomobilida kelib, toʻxtagan yigitlar bilan birga ayolni ariqdan chiqargan.

“Keyin yigitlarga IIB xodimi ekanim, ayolni tezda kasalxonaga olib borishlari kerakligini aytdim. Oʻzim uyga borib, pul olib kelishimni tushuntirdim. Ayolni ogʻir ahvolda tashlab ketmadim, aksincha shifokorlar uning hayotini saqlab qolishi va yaxshi qarashlari uchun uydan pul olib kelishga urindim”, degan u sudda.

Ayblanuvchi oʻsha payt oʻzini yomon his qilgani, biroq spirtli ichimlik isteʼmol qilgani bilan “hushyor” boʻlganini aytgan. Uyga pul olish uchun shoshib ketayotganda svetoforda qizil chiroq yonib qolgani sabab oldidagi Cobalt birdaniga toʻxtaganini, uning ortidan borib urilganini ham taʼkidlagan.

Ayol avariyada ogʻir tan jarohati olgani sabab Shovot tumani tibbiyot birlashmasida vafot etgan. Aybdor sudda qilmishidan pushaymonligini aytib, kechirim va suddan yengillik soʻragan.

Turmush oʻrtogʻi koʻrsatmasi

Marhumaning turmush oʻrtogʻi hodisa kuni ayoli bilan mehmonlarni kuzatish uchun koʻchaga chiqqanini aytgan. Uning soʻzlariga koʻra, yoʻl chetida ketishayotganda Tracker avtomobili turmush oʻrtogʻini urib yuborgan va ayol ariqqa tushib ketgan.

Shu vaqtda Gentra avtomobilidan tushgan ikki yigit yordamga kelib, jabrlanuvchini mashinaga chiqarishga koʻmaklashgan. Sudda koʻrsatma beruvchi haydovchini bir lahza koʻrganini, ammo ayolini qutqarish bilan band boʻlgani uchun u bilan gaplashmaganini aytgan.

“Gentra mashinasidan tushgan yigitlar turmush oʻrtogʻimni ariqdan chiqarishga yordamlashdi. Keyin ayolimni ularning avtomobiliga chiqarib, kasalxonaga olib bordik. Oʻsha paytda sudlanuvchi mashinasi turgan edi, uni bir lahza koʻrdim. Lekin u bilan gaplashmadik. Chunki ayolimni tezroq kasalxonaga olib borishni oʻylagandim”, degan jabrlanuvchining qonuniy vakili.

Shuningdek, u sudlanuvchini qisman kechirganini va undan moddiy yordam olganini bildirgan.

Guvohlar ham koʻrsatma bergan

Guvoh sifatida soʻzga chiqqan Gentra haydovchisi va uning doʻsti voqeani oʻz koʻzi bilan koʻrganini aytgan. Ularning taʼkidlashicha, Tracker avtomobili avval chiroqlarini yoqmasdan ular tomon harakatlangan, shu sabab rulni chetga burishga majbur boʻlgan.
Keyin ular Tracker ortidan harakatlanib, avtomobil piyodani urib yuborganiga guvoh boʻlgan. Guvohlar haydovchi voqea joyida odam urib yuborganini tan olganini, ammo jabrlanuvchiga amaliy yordam koʻrsatmaganini taʼkidlagan.

“Avariya boʻlgach, Tracker ham toʻxtadi. Haydovchidan “Odam urib yubordingiz, bildingizmi?”, deb soʻradik. U “Ha“ deb javob berdi, lekin yordam harakatini qilmadi. Jabrlangan ayolni koʻtarib, shifoxonaga olib bormoqchi boʻlib turgan paytimizda Tracker haydovchisini koʻrmadik”, degan guvohlar.

Sudda guvohlar Tracker haydovchisi ularga “ushbu ayolga yordamlashib yuboringlar”, demaganini ham bildirgan. Haydovchining “mazam boʻlmay turibdi”, degan gapini ham eshitmaganlarini taʼkidlashgan.

Sud hukmi

Jinoyat ishlari boʻyicha Shovot tumani sudi Umarbek Atamuratovni Jinoyat kodeksining 266-moddasi 2-qismi (transport vositalari harakati qoidalarini buzish odam oʻlimiga sabab boʻlishi) va 117-moddasi 2-qismi (xavf ostida qoldirish) bilan aybli deb topdi.

Sud hukmiga koʻra, ayblanuvchi 3 yil 1 oy muddatga ozodlikdan mahrum qilindi. Shuningdek, 3 yil davomida transport vositalarini boshqarish huquqidan mahrum etildi. Jazo manzil-koloniyada oʻtalishi belgilandi.

Sud hujjatida ayblanuvchi 2025-yil 30-sentyabr kuni qamoqqa olingani qayd etilgan. Jazo muddati hodisadan keyingi kun — 28-sentyabrdan amal qilishi belgilangan.

2026.3.1 O‘zbekistonda 10 yildan beri faoliyat yuritgan uyushgan narkojinoiy guruhlar aniqlandi
O‘zbekistonda 2026-yilning dastlabki ikki oyida narkotiklarni o‘tkazish va tarqatish bilan shug‘ullanuvchi 22 ta uyushgan narkojinoiy guruh faoliyatiga chek qo‘yildi. Bu haqda IIV matbuot xizmati xabar berdi.
Aniqlanishicha, ushbu uyushgan narkojinoiy guruhlar o‘rtacha 3 oydan 10 yilgacha vaqt oralig‘ida jinoiy faoliyat bilan shug‘ullanib kelgan. Qo‘lga olinganlarning besh nafari guruh yetakchilari va 84 nafari vositachi aʼzolar bo‘lgan. Bu narkojinoyatchilarning 20 nafari psixotrop dorilarni, 28 nafari anʼanaviy narkotiklarni tarqatish bilan shug‘ullangan. Shuningdek, 41 nafari sintetik narkotiklarni tarqatishni internet narkodo‘konlar orqali amalga oshirgan.
Uyushgan narkojinoiy guruhlar bir yilda o‘rtacha 1 million donadan ortiq psixotrop dori vositalarini, bir yil davomida 2-2,5 tonna gashish va opiy kabi narkotik moddalarni o‘tkazishni amalga oshirgan. Internet narkodo‘kon tomonidan bir yilda o‘rtacha 350 kilogramm, uch yil davomida 4 million dozaga teng bo‘lgan 700-800 kilogramm sintetik narkotik moddalarni “zakladka” usulida tarqatilgan.
Narkojinoiy guruhlar tomonidan turli xildagi giyohvandlik vositalarini Toshkent, Namangan, Andijon, Samarqand, Sirdaryo viloyatlarining jami 40 ta tuman-shaharlarida faol tarzda tarqatish amalga oshirilgan. Narkotik moddalar savdosi transchegaraviy va virtual xarakterga ega bo‘lib, Afg‘onistondan Surxondaryo orqali, Qirg‘izistondan Namangan va Andijon viloyatlari orqali, Qozog‘istondan Toshkent viloyati orqali respublika hududiga kontrabanda yo‘li bilan olib kirilgan.
O‘tgan 2023-yil davomida 14 ta yashirin narkolaboratoriyalar aniqlangan bo‘lsa, joriy yilning yanvar—fevral oylarida sakkizta narkolaboratoriya aniqlandi. Narkolaboratoriyalarning uchtasi psixotrop moddalarni tayyorlash bilan shug‘ullangan yashirin sexlar bo‘lsa, beshtasi esa sintetik narkotik moddalarni tayyorlovchi narkolaboratoriyalarni tashkil qilgan.
Tezkor tadbirlar natijasida yanvar-fevral oylarida 41 kilogramm anʼanaviy narkotiklar, 100 kilogrammdan ortiq sintetik narkotiklar, 1 million dozaga teng 200 mingga yaqin psixotrop dori vositalari va ikki tonnaga yaqin prekursorlar noqonuniy muomaladan olib qo‘yildi.
IIV Telegram’dagi “@stopnarko_bot”ga narkojinoyatlar bo‘yicha millionlab murojaatlar kelib tushayotganini bildirib, shubhali faoliyat yoki shaxslar haqida maʼlumotga ega bo‘lgan fuqarolardan ushbu botga yoki suratda ko‘rsatilgan ishonch telefon raqamlariga xabar berishni so‘radi.
Hozirda uyushgan narkojinoiy guruhlar faoliyatini to‘liq aniqlash, fosh etish va chek qo‘yishga qaratilgan kompleks tezkor-qidiruv tadbirlari davom ettirilmoqda.

2026.2.27 Dahshatli qotillik qurboni bo‘lgan Sayyora uchun g‘oyibona janoza o‘qildi
Turkiyaning Istanbul shahri Umroniya tumanidagi uylardan birida o‘ldirilgan o‘zbekistonlik Sayyora Ergashaliyeva uchun g‘oyibona janoza namozi o‘qildi. Bu haqda Turkiya mahalliy ommaviy axborot vositalari xabar berdi.
Kecha, 26 fevral kuni Shishli tumanidagi Fulya mahallasi masjidida o‘qilgan janoza namozida Sayyoraning otasi Bahrom Bo‘stonov, onasi Sohiba Bo‘stonova, O‘zbekiston xotin-qizlar huquqlari jamiyati raisi Ozoda Islomova va mahalla ahli ishtirok etgan.
Marosimida so‘zga chiqqan Sayyoraning otasi Bahrom Bo‘stonov va onasi Sohiba Bo‘stonova Prezident Rajab Toyib Erdo‘g‘anga minnatdorlik bildirgan.
“Qizimizning ruhi shod bo‘lsin. Biz Turkiya Respublikasiga, Prezident Rajab Toyib Erdo‘g‘anga, jinoyatni ochishga harakat qilayotgan Adliya vazirligiga va turk adolatiga ishonamiz. Biz qotillar eng og‘ir jazoga tortilishini istaymiz. Qizimizning g‘oyibona janozasini o‘qigan Turkiya Respublikasiga, muftiyatga, do‘stlarimizga, ustozlarimizga katta rahmat. Qidiruv ishlari davom etmoqda. Ishlar yakunlangach, o‘lim haqida e’lon beriladi”, degan u.
Sayyoraning vafoti
Joriy yilning 24 yanvar kuni Istanbulning Shishli tumani Kuyulubog‘ ko‘chasidagi chiqindi qutisidan 37 yashar o‘zbekistonlik Durdona Hakimovaning bo‘laklangan jasadi topildi.
Kamera yozuvlari va guvohlarning ko‘rsatmalariga ko‘ra, hodisa joyidagi axlat konteyneriga qoramtir kiyimdagi, soqolli ikki erkak och rangli chamadon bilan kelgani, keyin yana chamadon bilan piyoda ko‘chadan chiqib ketgani, gumonlanuvchilar chamadonni hodisa joyiga yaqin bo‘lgan Bozkurt ko‘chasi tomon tashlab ketgani aniqlangan.
Istanbul politsiyasi Istanbul aeroportida Gruziyaga qochmoqchi bo‘lgan paytda ikki nafar qotillikda gumonlanuvchini qo‘lga olgan. Ularning ikkalasi ham O‘zbekiston fuqarolari ekani ma’lum bo‘lgan. Razvedka bo‘limi va Qotillik bo‘limi tomonidan bir necha soat ichida ushlangan gumonlanuvchilardan biri qotillikni bevosita sodir etgan, ikkinchisi esa yordam bergani aniqlangan. Shuningdek, gumonlanuvchilar foydalangan taksini boshqargan shaxs ham qo‘lga olingan. Shu tariqa ish bo‘yicha hibsga olinganlar soni 3 nafarga yetgan.
Fevral oyiga kelib, mazkur ish doirasida olib borilgan surishtiruvlar natijasida Durdona Hakimova o‘ldirilgan Umroniyadagi uyda yana bir o‘zbekistonlik ayol – Sayyora Ergashaliyeva ham bo‘laklab o‘ldirilgani aniqlandi.
Turkiya huquqni muhofaza qiluvchi organlaridan olingan dastlabki ma’lumotlarga ko‘ra, avval Durdona Hakimovaning o‘limi bilan bog‘liq hodisadan so‘ng bedarak yo‘qolgan deb topilgan fuqaro 1994 yilda Namangan viloyatida tug‘ilgan Sayyora Ergashaliyevaning aynan Durdona Hkamiova qotilligida gumonlanayotgan shaxslar tomonidan o‘ldirilgani aniqlangan. Sayyora Ergashaliyeva Durdona Hakimovaning yaqin dugonasi bo‘lgan.
23 yanvar kuni gumonlanuvchilar T.D. va G‘.K. o‘zaro til biriktirgan va Ergashaliyevani avval pichoq bilan o‘ldirib, jasadni bo‘laklab, Fotih tumanidagi axlat qutilariga tashlagan. 24 yanvar kuni qotillar Ergashaliyevaning telefonidan Hakimovaga SMS xabar yuborib, uni ham chaqirib, Ergashaliyeva singari uni ham pichoq bilan o‘ldirib, tanani bir nechta qismlarga bo‘lib, Shishli tumanidagi chiqindi qutilariga tashlagan.
Hozirgacha Ergashaliyevaning jasadi topilmagan.

2026.2.24 Toshkentda yana bir narkolaboratoriya aniqlanib, minglab psixotrop dorilar musodara qilindi
O‘tgan hafta Toshkentda yana bir narkolaboratoriya fosh etildi va minglab psixotrop dorilar musodara qilindi, jumladan shahar bo‘ylab xufiya joylardan ham olindi. 10 ga yaqin shaxs qo‘lga olingan. Yil boshidan buyon narkolaboratoriyalar aniqlangani haqida bir qator holatlar xabar qilingan.
Toshkent shahrida yana bir narkolaboratoriya fosh etildi hamda katta miqdordagi giyohvandlik vositalari musodara qilindi, deb xabar bermoqda DXX matbuot xizmati.
Toshkent viloyatida o‘tkazilgan tezkor tadbirda Yuqori Chirchiq tumani hududida harakatlanayotgan Spark rusumli avtomashina to‘xtatilib, ko‘zdan kechirilgan. Unda internet narkodo‘konga xizmat qiluvchi, 33, 32 va 31 yoshli poytaxtlik 3 nafar fuqaro ketayotgani aniqlanib, ulardan 37 dona “Tropikamid” hamda tarkibida pregabalin kuchli ta’sir qiluvchi modda saqlagan 124 dona kapsula ashyoviy dalil sifatida olingan.
Tezkor tadbir davomida internet narkodo‘konning 28 yoshli ikki nafar “zakladchik”lari ham ushlanib, ular orqali poytaxtning turli hududlaridagi xufiya joylardan jami 1186 dona “Pregabalin” va 125 dona “Tropikamid” olingan.
Aniqlanishicha, ular kuchli ta’sir qiluvchi dori vositalarini Sergeli tumanida faoliyat yuritayotgan narkolaboratoriyadan olgan. Unda 39, 33, 31 va 26 yoshli 4 nafar shaxs kuchli ta’sir qiluvchi dori vositalarini tayyorlayotgani ma’lum bo‘ldi. Mazkur xonadondan 5130 dona “Pregabalin” kapsulalari va 10 kg “Pregabalin” moddasi, 75 dona flakonda “Tropikamid” va 6 kg “Tropikamid” moddasi, shuningdek, jami 60 ming dona bo‘sh kapsula va flakonlar, laboratoriya jihozlari protsessual tartibda rasmiylashtirib olindi.
Qo‘lga olinganlarga nisbatan Jinoyat kodeksining 251−1-moddasi (Kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilib, qamoq ehtiyot chorasi qo‘llanildi.
Yana bir holatda poytaxt hududida o‘tkazilgan tezkor tadbirda 39 yoshli shaxsning Shayxontohur tumanidagi yashash xonadoni ko‘zdan kechirilganida uyidan va avtomashinasidan 16 227 dona “Pregabalin”, 7 947 dona “Regapen”, 35 dona “Lirika” va 14 dona “Perge” — jami 24 223 dona kuchli ta’sir qiluvchi dori vositalari olindi.
Tergovga qadar tekshiruv davomida aniqlanishicha, mazkur shaxs muqaddam kontrabandachilar tomonidan Qirg‘izistondan Farg‘ona viloyati hududiga o‘tkazilgan ushbu dori vositalarini 34 ming dollar evaziga sotib olib, kelgusida Toshkent shahrida qayta sotish orqali mo‘may daromad topishni maqsad qilgan.
Holat yuzasidan unga nisbatan Jinoyat kodeksining 251−1-moddasi 5-qismi bilan jinoyat ishi qo‘zg‘atilib, qamoq ehtiyot chorasi qo‘llanildi. Shuningdek, uning Farg‘ona viloyatidagi jinoiy sheriklarini shaxsiga aniqlik kiritish va qo‘lga olish bo‘yicha zarur chora-tadbirlar ko‘rilmoqda.
Yil boshidan buyon aniqlangan narkolaboratoriyalar
Yil boshidan buyon Davlat xavfsizlik xizmati, Bosh prokuratura huzuridagi Iqtisodiy jinoyatlarga qarshi kurashish departamenti va Ichki ishlar vazirligi narkolaboratoriyalar faoliyatiga chek qo‘yilgani bo‘yicha qator holatlar haqida xabar bergan.
Fevral oyida Toshkentda sintetik narkotiklar ishlab chiqarilgan narkolaboratoriya fosh etilib, 5,3 kg miqdordagi moddalar topilgan. Yana biri talaba ijaraga olgan xonadonda tashkil etilgan bo‘lib, u yerdan 2 kg mefedron aniqlangan. Andijondagi narkolaboratoriyada esa 1,5 tonna prekursor va 26 kg mefedron musodara qilingan.
Fevral o‘rtalarida Bojxona qo‘mitasi Niderlandiyadan konfet ko‘rinishida yuborilgan, tarkibida 1,3 kgdan ortiq klofedron bo‘lgan taqiqlangan moddalar partiyasi aniqlanganini ma’lum qilgan. Tovarni qabul qilishi kerak bo‘lgan shaxs manzilida esa 5,3 kg sintetik narkotik saqlangan narkolaboratoriya topilgan. Qo‘mita ma’lumotiga ko‘ra, uning xodimlari 2025-yil boshidan beri 7 ta narkolaboratoriyani aniqlagan.
Poytaxtning Olmazor tumanida esa Shon-shuxrat mahallasi profilaktika inspektori xizmat uyida mefedron ishlab chiqarish laboratoriyasini tashkil etgan va mahsulotni kriptovalyuta orqali sotib daromad olgan. Kun.uz xabar berishicha, sud uni 12 yilga ozodlikdan mahrum etgan.
Prezident tanqidi
Yanvar oxirida o‘tkazilgan yig‘ilishda prezident Shavkat Mirziyoyev narkojinoyatchilik va uyushgan guruhlarga qarshi kurash bo‘yicha narkokanallarning oxirgi manbasi va homiylarigacha yetib borish uchun mas’ullarda qat’iyat yo‘qligini tanqid qilgan edi. O‘shanda so‘nggi uch oyda O‘zbekistonda 50 ga yaqin yirik narkoguruh a’zolari qo‘lga olingani va yarim tonna narkotik musodara qilingani xabar qilingan.
2024-yil noyabrida Narkotiklarni nazorat qilish milliy markazining sobiq direktori Ravshan Mamatov so‘nggi besh yilda mamlakatda narkojinoyatlar soni ikki barobarga oshgani, musodara qilingan narkotiklar hajmi 8,5 barobarga, sintetik narkotiklar esa 400 barobarga ko‘payganini ma’lum qilgan. 2025-yilda mazkur markaz negizida Narkotiklar va o‘qotar qurollarni nazorat qilish agentligi tashkil etilgan. Shu yig‘ilishdan so‘ng prezident Ravshan Mamatovni lavozimidan ozod etgan.

2026.2.13 Bir qotillik izidan ochilgan ikkinchi vahshiylik

Turkiyada yana bir o‘zbekistonlik ayol vahshiylarcha o‘ldirilgani aniqlandi. Boshi uzib tashlangan, tana a’zolari esa bo‘laklab chiqindi idishlariga uloqtirilgan Durdona Hakimova bilan bog‘liq jinoyat ishining dahshati hali tarqab ulgurmasidan, endi uning dugonasi ham u o‘ldirilgan uyda maydalab tashlangani haqidagi ma’lumotlar paydo bo‘ldi.

Qotillar ham o‘shalar – ikki o‘zbek erkagi. Istanbulning Shishli tumanida yanvar oyi oxirida boshlangan “chamadon qotilligi” tergovida kutilmagan va fojiali burilish paydo bo‘ldi. Avvaliga faqat bir ayolning ayanchli taqdiri bo‘lib ko‘ringan bu jinoyat ortida o‘zbekistonlik muhojirlar tomonidan sodir etilgan seriyali vahshiylik yashiringani fosh bo‘ldi.

Ikkinchi qurbon: Sayyoraning sirli g‘oyib bo‘lishi

Joriy yil, 6 fevral kuni 32 yoshli Sayyora Ergashaliyevaning oilasi ijtimoiy tarmoqlar orqali murojaat qilib, qizlaridan darak yo‘qligini ma’lum qildi. Sayyora 2025 yilning 28 dekabrida Turkiyaga kelgan va oxirgi marta qotillikdan bir kun oldin 23 yanvar kuni aloqaga chiqqanini aytishdi. Qizi bilan bog‘lanolmagan ota-ona uni topish umidida Turkiyaga uchib kelgan.

Politsiya kuzatuv kameralari orqali Sayyoraning so‘nggi bor ko‘ringan manzilini tekshirganda, mudhish haqiqat yuzaga chiqdi. U aynan 24 yanvar kuni bo‘laklangan holda topilgan Durdona Hakimovaning qotilligi sodir bo‘lgan uyga borgan. Kamera yozuvlari shuni ko‘rsatadiki, Sayyora 23 yanvar kuni uyga kirgan va u yerdan boshqa chiqmagan. Uning ortidan esa Durdonaning o‘limida gumonlanayotgan ikki shaxs – 31 yoshli Dilshod Turdimurodov va 29 yoshli G‘ofurjon Kamolxo‘jayev ham shu manzilga kirganini aniqlagan.

Sayyora Durdonadan bor-yo‘g‘i bir kun oldin, aynan bir xil uslubda o‘ldirilib, jasadi ham bo‘laklangan holda turli hududlarga tashlab yuborilgan. Tekshiruv davomida Sayyora Ergashaliyeva va Durdona Hakimova hamda ikki gumonlanuvchi maqomida bo‘lib turgan mavjudotlar qariyb bir oy davomida bir uyda yashagani, marhuma Sayyora va G‘ofur esa o‘zaro munosabatda bo‘lgani aniqlangan.

Politsiya xavfsizlik kameralarini ko‘zdan kechirib, 24 yanvar kuni gumonlanuvchilar uydan bir necha bor chiqindi qoplari bilan chiqib ketganini, so‘ng oq rangli chamadon bilan manzilni tark etganini aniqlashgan. Qarang, yana chamadon. Durdonaning jasadini ham xuddi shunday, katta ko‘chada olib yurishgan payti ularda hayajon yoki qo‘rquv sezilmagani jamoatchilik tomonidan alohida muhokama qilingan edi. Endi yangi ochilgan tafsilotlar sabab ularda tajriba borligini taxmin qilish mumkin.

Kuzatuvga qaytamiz. Qotillikda gumon qilinayotgan kimsalar bemalol ko‘chadan taksi to‘xtatib, murda yoki uning bir qismi joylashtirilgan chamadon bilan Fotih tumaniga borgani, jasad bo‘laklarini axlat konteyneriga tashlagach, piyoda “Yenikapı Marmaray” bekatiga yo‘l olgani aniqlangan.
Tergov jarayonida Durdona Hakimova qotilligi bo‘yicha hibsda bo‘lgan ikki o‘zbekistonlik bilan o‘tkazilgan so‘roqlarda Sayyora Ergashaliyeva ham 23 yanvar kuni ayni uyda sovuq qurol bilan o‘ldirilgani ma’lum bo‘lgan. Prokuror ko‘rsatmasiga asosan jazoni ijro etish muassasasidan olib chiqilib, yana qo‘lga olingan ikki gumonlanuvchilarga nisbatan “qasddan odam o‘ldirish” moddasi bo‘yicha jinoyat ishi qo‘zg‘atilgan. Ichki ishlar idorasidagi tergov harakatlaridan so‘ng ularni bugun, 13 fevral kuni sudga olib borilishi kutilmoqda.

Birinchi fojia: Axlat konteyneridagi “qonli topilma”

Ushbu zanjirli jinoyatlar joriy yil, 24 yanvar kuni Shishlining Duatepe mahallasida fosh bo‘lgan edi. Chiqindi yig‘uvchi Okan ismli shaxs konteynerdan choyshabga o‘ralgan, boshi va oyoqlari kesilgan ayol tanasini topgan. Olib borilgan tezkor qidiruv ishlari natijasida qurbonning shaxsi barmoq izlari orqali aniqlangan – u 37 yoshli Durdona Hakimova edi.

Jinoyatchilar o‘z qurbonini shunchalik sovuqqonlik bilan bo‘laklashganki, har bir tana a’zosini alohida yelim xaltaga joylab, qadoqlashgan! Jinoyatni sodir etganlikda gumonlanayotgan ikki shaxs – 31 yoshli Dilshod Turdimurodov va 29 yoshli G‘ofurjon Kamolxo‘jayev o‘sha kunning o‘zidayoq Gruziyaga qochmoqchi bo‘lganida, Istanbul aeroportida qo‘lga olindi. Turkiyaning mahalliy OAVlari ular qochishga ham puxta tayyorgarlik ko‘rgani, hatto qotillik va qochish orasida sartaroshxonaga kirib soch-soqolini olishga ham vaqt topishgani haqida xabar berdi.

Dahshatli qotillik Turkiyada jamoatchilik orasida turli muhokamalarga sabab bo‘ldi. Hatto, xotin-qizlar tomonidan norozilik namoyishlari ham o‘tkazildi. Turli ayollar huquqiga oid va mahalliy hokimiyatni ayblashga qaratilgan bannerni ko‘targan norozilik faollari ko‘chaga chiqdi.

30 yanvar kuni Durdona Hakimovaning jasadi va uning ikki nafar farzandi O‘zbekistonning Istanbul shahridagi Bosh konsulxonasi ko‘magida Vatanga qaytarilgani, barcha xarajatlar Bosh konsulxona hamda Migratsiya agentligi hisobidan qoplab berilgani ma’lum qilindi.

Sovuqqon qotillar

Tergov davomida qotillarining harakatlari tahlil qilinsa, bu tasodifiy jinoyat emas, balki tizimli vahshiylik ekani ko‘rinadi. Dastlabki ma’lumotlarga ko‘ra, joriy yil 22 yanvar kuni marhumalar hamda gumonlanuvchilar Istanbul shahrining Fotih tumanida joylashgan restoranlardan birida birgalikda tushlik qilgan. Uchrashuv davomida Sayyora va G‘ofur o‘rtasida kelishmovchilik yuzaga kelgan. Taxminlarga ko‘ra, mojaro ayol O‘zbekistonga qaytmoqchi bo‘lgani uchun kelib chiqqan.

Bu tortishuvdan 1 kun o‘tib, 23 yanvar kuni ikki do‘st o‘zaro til biriktirib, Sayyora Ergashaliyevani avval pichoq bilan o‘ldirib, tanani bir necha qismlarga bo‘lib, Fotih tumanidagi axlat qutilariga tashlagan. 24 yanvar kuni qotillar birinchi qurbonlarining telefonidan Durdona Hakimovaga SMS xabar yuborib, uni aldab chaqirib, dugonasi singari pichoq tiqib o‘ldirib, tanani bir nechta qismlarga bo‘lib, Shishli tumanidagi axlat qutilariga tashlagan.

Bugun, Sayyora Ergashaliyevaning ham jasadi topilganligi haqida turk OAVda keskin muhokamalar avj olgan. Biroq, Istanbul Sud tibbiy ekspertizasiga hozircha jasad olib kelinmagani ma’lum qilindi. O‘zbekiston Respublikasining Istanbul shahridagi Bosh konsulxonasi mazkur holatni doimiy nazoratga olgani va Turkiya huquqni muhofaza qiluvchi organlari bilan yaqin hamkorlikda ish olib borayotgani haqida rasmiy ma’lumot berdi.

Tahliliy xulosa: Musofirlikdagi xavfli “tanishuvlar”

Ushbu voqea o‘zbekistonlik muhojirlar orasidagi ijtimoiy xavfsizlik masalasini zaruriy tarzda kun tartibiga qo‘yadi. Qotillarning ham, qurbonlarning ham bitta millat vakillari ekani, jinoyatning bunday o‘ta vahshiy usulda sodir etilgani jamiyat uchun jiddiy signaldir.

“Qanday qilib inson o‘z vatandoshiga nisbatan bunday vahshiylikni amalga oshirishi mumkin? Bu shunchaki “janjal” oqibati emas, balki ichki olami yemirilgan, marazlikka mukkasidan ketgan, qonundan qo‘rqmaydigan shaxslarning rejalashtirilgan harakatiga o‘xshaydi” mazmunida fikr bildirayotganlar ko‘p.

Istanbulning Shishli tumanidagi o‘sha xonadonning ikki ayol uchun “qabrga aylanishi”, xorijda yashayotgan vatandoshlarimizni yanada hushyorroq bo‘lishga va tanishuvlarda ehtiyotkorlikni yo‘qotmaslikka chorlashi shart. Siz bugun turli sabablar bilan ishonayotgan odamingiz ertaga sizni qassob qo‘yni burdalaganidek, chavaqalab tashlamasligiga aniq ishonch hosil qilishingiz kerak.

Sizningcha, xorijda yurgan vatandoshlarimiz xavfsizligini ta’minlash uchun nimalarga e’tibor berish kerak? Bu kabi jinoyatlarning oldini olish mumkinmi?